الكرشه والممبار ولحمة الراس

ألي يتحب الكوارع والممبار ولحمة الراس والاكل الفظييييييييع ده
يتفضل بالف عافيه
وألي مش بتحبه تتفضل برضو تتفرج
الاول دي الصوره بالكامل

الكرشه والممبار ولحمة الراس P3y54124

الاول نبتدي بالكوارع

انا حبيت اصور لكم الكوارع والكرشه ولحمة الراس واللمبار

قبل السوا علشان تشوفوا المفروض يكونوا نضاف ازاي

الكرشه والممبار ولحمة الراس EPz54124

طبعا بعد ما نشتريهم بنغسلهم الاول بالدقيق والملح

وبعدين بالمايه وننقعهم شويه بالمايه والخل طبعا مع تنضيف اي بقايا او شعر وخلافه

الكرشه والممبار ولحمة الراس COY54239

ودي صورة الكرشه
انا قطعتها مربعات صغيره عشان هربطها بعد كده بالممبار
علي شكل فيونكات
الكرشه والممبار ولحمة الراس LlO54567

ودي صورة الممبار
طريقة غسل الممبار
نقطعه حتت صغيره بالمقص حسب ما تحبي
وتحت الحنفيه ننضفه من بره وبعدين نقلبه ونشيل بالسكينه الطبقه الي جوه وبعدين نغسله كويس بالملح الخشن والدقيق وننقعه شويه بالخل
الاول نجيب كل قطعه من الكرشه ألي علي شكل مربع ونتنيها ونربطها بقطعه من الممبار شبه الفيونكه
اسفه نسيت اصور الخطوه دي بس هتشوفو صوة الشكل النهائي
ونشيل الباقي من الممبار علشان نحشيه بعد كده
نغلي ماية علي النار ونحط فيها الكرشه والكوارع ونغليها غلوتين ونشل الريم كل ما يظهر وبعدين نصفيها ونكب الماية
في حله تانيه نكون غلينا ماية ونحط فيها لحمة الراس ودي صورتها وهي نية ومعاها قطع من الطحال

الكرشه والممبار ولحمة الراس ExY54124

وتغلي غلوتين مع ازالة الريم كل مايظهر وبعدين نصفيها ونرمي الماية

نجيب حلة الضغط ونضع فيها ماية نظيفه ولما تغلي نضع الكوارع والممبار واللحمه وكل الي غليناه الاول
ومعاهم بصله صحيحه متقشره
ولما تغلي نشيل الريم ونضيف توم كتير مهروس وملح وفلفل ابيض وهيل ومستكه

الكرشه والممبار ولحمة الراس GPx54239

ونغطي الحله ونسيبها علي النار حوالي ساعه وبعدين نفتحها بعد ما نطفي وكل البخار يتبخر ونشيل منها الكرشه والطحال والكوارع لأنهم هيكونوا استووا
وبعدين نقفلها تاني عشان لحمة الراس تكمل سوا لمدة ساعه الا ربع
وبعدين نطلعهم في صينيه بالشكل ده
الكرشه والممبار ولحمة الراس Xt254183

نرجع لباقي الممبار
نعمل الحشو
نقطع خضره (كزبره +شبت +بقدونس) ونغسل رز
ونقطع بصل وكله مع بعض

الكرشه والممبار ولحمة الراس MYl54239

نعصر طماطم ونضيفها عليهم ونضيف نعناع ناشف وملح وبهارات وفلفل

الكرشه والممبار ولحمة الراس RDz54239

نقلب الحشو كويس ونحشي الممبار وبعد ما نخلص نغرزه بالشوكه علشان مايتفكش في السلق ونخلي بالنا مانزودش الحشو
الكرشه والممبار ولحمة الراس EBo54238

نحضر صلصة التحمير
معلقة زيت علي النار ومعاهم توم مفروم ولما يتحمر نزود شوربه
ومعلقة صلصه ونسيبهم يغلو شويه

الكرشه والممبار ولحمة الراس 6YX54183

ونحط منها علي وش اللحمه والكوارع والكرشه وندخلها الفرن تحت الشوايه
ونحضر العيش بتاع الفته
نقطعه قطع صغيره ونحط عليه باقي صلصة التحمير وندخله الفرن يتحمص

الكرشه والممبار ولحمة الراس Aia54124

نحضر الرز للفته
نغلي كوب شوربه مع كوب ماية ونضع عليهم كوب رز مغسول
ونظبط الملح والفلفل ونوطي النار لحد ما الرز يستوي

صلصة الفته
معلقة زيت علي النار ومعاها توم مفروم ولما يتحمر نزود معلقتين خل ونسيبها دقيقتين تغلي وبعدين عصير الطماطم وملح وبهارات لحد ما تتسبك

نرجع للمبار
نغلي ماية علي النار ومعاها ورق لوري نحط عليهم الممبار وبياخد تقريبا 45 دقيقه وبعدين نطلعه ونحمره في الزيت
ونحمر الطحال
ونحطهم علي طبق التقديم
وهنا الصوره معاهم فيونكات الكرشه

الكرشه والممبار ولحمة الراس 7oA54183

نطلع العيش بتاع الفته ونحط عليه الرز ونزود كبش شوربه
ونضيف اخر حاجه الصلصه بتاعة الفته

الكرشه والممبار ولحمة الراس ZWf54183

ودي صورة اللحمه والكوارع بعد خروجها من الفرن

الكرشه والممبار ولحمة الراس S6m54183

ودي صورة الشوربه بتاعة الممبار
وهمممممممممممممم
الكرشه والممبار ولحمة الراس Xec54124

ودي الصوره كامله
اتفضلو بالف عافيه علي قلوبكم

الكرشه والممبار ولحمة الراس P3y54124

وعلي فكرة وجبه جميله جدا في رمضان
انا عن نفسي لازم كل رمضان انفذها
لاني بحبها اووووووووووووي
وبالهنا والشفا

شكرا ست الكل وكل سنه وانتى طيبه

والله الصورة تتاكل فى رمضان وغير رمضان

» قبل ما توقع الفاس فى الراس