قصة حب اغرب من الخيال

انا جايبلكم قصه واحد حكهالى بس لو سمحتو مش عايز تريقه
صاحبى ده بيحكيلى بيقلى عندنا فى الشرقيه فيه واحد جارنا اسمو على كان بيحب بنت زميلتو فى المدرسه اسمها فاطمه
فاطمه وعلى طول عمرهم مع بعض مفترقوش
سنين الدراسه قضوها سوا من ابتدائى لحد ثانوى
وكان كل سنه حبهم بيزيد فى المدرسه مع بعض بياخدو دروس مع بعض
ودايما على اتصال ببعض واهاليهم عارفه مدى تعلقهم ببعض بس بيقولو لسه صغيرين على الحب والكلام ده
المهم على خلص ثانوى ودخل كلية تجاره فى اسكندريه وهى كمان خلصة ثانوى ودخلة كليه اداب عين شمس فافترقو عن بعض
لاكن هما برضو على اتصال ببعض
واتفقو يتكلمو كل يوم على النت واتفقو على ميعاد
كل يوم الساعه سبعه هى تفتح الايميل وهو يفتح الايميل ويتكلمو وبعد المسافات زود فيه الاشتياق لبعض وكبر حبهم وهما بيكبرو مع بعض لحد مخلصو جامعه
فاطمه قالتلو تيجى تخطبنى ونتجوز قالها انا لسه مش معايا حاجه ومكونتش نفسى وانتى عارفه بحبك قد ايه واهلى مش هيوافقو على خطوبه قبل ما اخواتى الاكبر منى يخطبو او اكون انا جاهز لده على الاقل انتى عارفه ان حالتنا متسمحش بده دلوقتى وقالها انا جايلى عقد عمل فى السعوديه هسافر سنه وارجع اخطبك ونتجوز بس انتى اوعى حد يتقدملك واهلى يضغطو عليكى وتوافقى
اتفقو على كدا وعلى سافر وكانو كل يوم يتكلمو الساعه سبعه على النت بقى ميعاد مقدس بينهم الساعه سبعه كل يوم يتكلمو ومرت ست شهور وفاطمه فى يوم خارجه من بيتهم حصلها حادث سياره وتوفيت على اثره فى المستشفى طبعا اهل على خافو يقولو ده يتعب فى الغربه لوحدو ومكانوش عارفين انهم كل يوم بيكلمو بعض نت
وبعد ست شهور من وفات فاطمه نزل على اجازه وهو فرحان علشان جه اليوم اللى هيخطب فيه فاطمه
سلم على اهلو ومقدرش يقد وقال لابوه انا رايح بيت فاطمه اسلم عليها ابوه قالو لا متروحش دلوقتى انت لسه جاى من سفر وتعبان بس هو اصر انو يروح وابوه مش عارف يقولو ايه فراح على لبيت فاطمه وقابل ابوها وشرب الشاى وقال لابوها هى فاطمه فين انا جاى مخصوص اسلم عليها
ابوها استغرب وقالو هو والدك مقلكش انت معرفتش وانت بره
قالو هو فيه ايه
قالو فاطمه تعيش انت
على ضحك وقالو يا عمى بلاش الكلام ده دانا جاى اخطبها تقلى اتوفت ابوها مستغرب جدا من كلام على بس قالو واللله فاطمه توفيت من ست شهور على مصدقش قام ابوها جابلو شهادت وفاتها على اتجنن وقالو انت مزور الشهاده دى اكيد انت ضغط عليها علشان تجوزها فهربت منك وعلشان تدارى عارك عملتلها شهادة وفاه
قام ابوها زعقلو وطردو من البيت
على بقى ماشى فى الشارع مجنون وقرر يعمل محضر لابوها فى القسم
وراح القسم وقدم محضر ان ابوها مزور شهادة وفاه لبنتو
القسم طلب ابوها وجه وكمان جم اهل على وقالولو يابنى دى توفيت بجد واحنا خبينا عليك خفنا عليك فى الغربه ايه اللى انت عملتو ده
الظابط قال لابوها بنتك فين قالو بنتى توفت فى تاريخ كذا والمحضر عندك ودى شهادت وفاتها
الظابط طلع المحضر لقيه صح بس على قالو لا هو دفن غيرها اكيد هي هربانه منو قالو وانت متاكد ليه كدا قالو انا كل يوم بكلم فاطمه على النت واقرب يوم امبارح قلتلها تستنانى وتقول لاهلها انى نازل مصر وهاجى اخطبها
الظابط قالو يمكن بتكلم غيرها قالو لا هى انا بكلمها صوت وصوره وبعدين احنا كل يوم بنتكلم ومستحيل تكون مش هيا الظابط استغرب وقالو طيب كلمها على النت الساعه سبعه زى مابتقول جات الساعه سبعه وعلى فتح الايميل لقى فاطمه فاتحه ومستنياه قالها انتى فين انا رحت بيتكم مش لقيتك قالتلو ايوه انا مش فى البيت وابقى اقلك بعدين ومتضغطش عليا دلوقتى
على قال للظابط شفت اهه موجوده ممتتش
الظابط قلو خليها تكلمك على الكاميرا ولما كلمتو ابوها واهلها شافوها وقالو ايوه دى بنتنا دى فاطمه بس اللبس اللى لابساه ده مش عندها ومكنش فى حياتها الظابط قالو يعنى بنتك موجوده اهه امال انت دفنت مين حلف للظابط انو دفن بنتو وهو اللى مغسلها بايدو ومستغرب جدا ازاى دفنها وهى لسه حيه الظابط حول المحضر نيابه والنيابه امرت باستخراج الجثه وتشريحها لمعرفت جثة فاطمه ولا لا وتحليل دى ان ايه للجثه
المهم راحو كلهم بصحبت النيابه والشرطه المدافن وكيل النيابه قال للحانوتى افتح القبر ده وهات الجثه اللى فيه
وبعد ما فتح القبر بتاع فاطمه وجدو حاجه غريبه جدا كلهم استغربو وزهلو من اللى شافوه
يا ترى هما شافو ايه فى قبر فاطمه ؟
ياترى بعد ست شهور من الوفاه لقيو فى قبر فاطمه ايه؟
ازاى فاطمه ميته وبتكلم على كل يوم على النت؟
ياترى هما مستغربين ومذهولين ليه شافو ايه؟
وجدو ايه فى قبر فاطمه؟



فكرو معايا وهجيلكم بباقى القصه بعد الردود ان كان لينا عمر
ومره تانيه لو سمحتو بلاش تريقه لان الموضوع موءثر جدا ودى وفاة انسانه

استاذ محسن ممكن تكمل القصه بعد اذنك انا عوزه اعرف بجد
وع فكره لو طلعت ف الاخر نكته هعمل عليك حمله ف المنتدي

ههههههههههههههههههههههههههههه
حملة ايه تطعيم معلهش انا لسه واخد حقنة سنه ونص امبارح
وعلى العموم القصه لو دايقك انا اسف انا ممكن احذفها

هههههههههههههههه
لا مش ضايقتي بس هي مثيره جدا وخيفه ف الاخر تطلع نكته مش حقيقه
ممكن تكملها بقي
بليييييييييييييييييييييييييييييييييييييييييز

مش للدرجادي يا استاذ فريد
اكيد استاذ محسن عنده نهايه حقيقيه
ولا ايييييييييييييييييييييييييييه

اكيد لقيو كمبيوترونت معاها
هههههههههههههههههههه

ربنا يخليك يا استاذ فريد يارب
ولو ثبت كلامك هعمل عليه حمله نطلب فيها انه يالف نهايه للقصه ترضي الجماهير وهو حر
اما بالنسبه للجوكر تفتكر كان النت وصله من مقبره جنبها ولا كان معاها فلاشه اتصالات؟؟؟؟؟؟؟؟؟؟؟؟؟

يعنى بعد كل دة وهتكمل القصة بعد الردود
بس لوطلع مقلب
هزعل بجد لانك شوقتنى

على فكره يا جماعه انا شفت حجم القصه خفت علشان انا معنديش بال طويل للقرائه بس لما شفت ردكم باين عليها حلوه بس لو كانت فى الاخر نكته انا مش عرفه انا ممكن اعمل ايه فى الاستاذ محسن ؟؟؟؟

انا قريت القصه بس لو كانت نكته ياريت لو سمحتوا تسبونى انا اللى احكم عليه

هو فيه ايه يا جماعه هى الحمله بداءت بالفعل اهه
طيب بدل الكلام الكتير ده وردودكم متحاولو تفكرو شويه
او على الاقل تقولو توقعاتكم وبرضو مستنى الردود بتاعتكم
ومستنى الحمله اللى هتعملوها لانى هشاركم فيها لانى مش راضى على القصه دى
بس حاولت اشوقكم واخليكم تفكرو معايا
وبرضو اوعدكم انى هجيبلكم نهايه القصه
بس فين مجهودكم الفكرى

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كمان مطلوب مننا نفكر
لولو ابدأي وشوفي تحكمي بايه
ع ما نشوف الحمله هتكون ازاي
هههههههههههههههههههههههههههههههههههه

لا يا جماعه دى شكلها نكته والاستاذ محسن بيحاول ينسينا بس لالالالالالالالالالالالالالا احنا مش هنسيبك يا استاذ محسن وانا جاهزه لاصدار الحكم ...........

الى الاستاذ / محسن
فى الواقع ان افضل القصص القصيرة هى متروكة النهاية المفتوحة عكس النهايات المحلولة فمن الافضل ان تترك النهايات للقارىء حتى يتم نوع من المشاركة والتفاعل بين القارىء والكاتب والقصة
نقيس على قصتنا فمن المقترح ما يلى
1- ان البطلة ام تمت ولم يجدوا الجثة اصلا
2-ان المدفون غير البطلة ربما كان ذكرا مثلا
3- الذهول ربما يكون ناتج من انهم لم يجدوا جثة لمرور فترة على الدفن
4-ربما تكون القبرة ليست هى
الى اخرة من مقترحات الحل
واذا وضعت لنا الحل كنا نمصمص الشفايف وننساها مع نهاية قرائتها لكن الان لن ننساها بارك الله فيك لكن اوصيك بما يلى
الاهتمام بالاخطاء الاملائية
الاهتمام بالحوار والسرد
رتب البداية ثم الموضوع ثم المشكلة ثم الحل
اخيرا اقبلنى صديقالك وبلاش تتعب القراء

عن فكرا بعد ردودكم الطيبه دى انهى القصه دى نهايه ترضى توقعاتكم جميعا
علشان محدش يزعل منى وكمان عايز الاخ فريد ميزعلش ونمشى ورا كلامه بس انا هسيبلكم نهايتين نهايه حقيقيه كما رويت لى ونهايه من تاليفى علشان مزعلش حد
وهسيبكم انتو تقررو اى النهايات افضل او وممكن كمان نعمل مسابقه هنا لافضل واحد هيضع رد فيه نهايه للقصه دى
لو وافقتم على المسابقه يبقى نبتدى من اول رد راح يوصلنى كل واحد يضع نهايه ونشوف اجمل نهايه للقصه
انا قلتلكم عندى نهايتين حقيقيه واخرى من خيالى لارضاءكم
الاولى
عندما تم الحفر وفتح قبر فاطمه زهل الجميع من روع ما رأو
لقد وجدو لافته كتب عليها عفواً هذا القبر قبر خاطىء يرجى الحفر فى مكان اخر
الثانيه
وجدة جثه لم تتعفن بعد بعد مضى ستت اشهر من دفنها الجثه مبتسمه ويبدو عليها الفرح الغريب ان والد واهل الفتاه لم يتعرفو على الجثه وبتحليل دى ان ايه لم يثبت نسب الجثه لاهلها اى انها جثه مجهوله وليست جثة فاطمه
بعد مرور عدة ايام كان على يتصفح الانترنت واذ برساله تاتيه من فاطمه
تقول له حبيبى على هذه اخر رسالاتى اليك لا تبحث عنى كثيرا ان اردت ان ترانى فاغمض عينيك ولو لثوانى
مع تحياتى محسن البدراوى

اخ محسن ياريت تقرا ردى سابقا

القصه دى جابها ابو الطاهر قبل كده ونشرها فى المنتدى فى قسم الحوار العام بتاريخ 25 فبراير 2011 وعلقتى عليها قبل كده مهندسه القلوب يوم الثلاثاء 1/3/2011 الساعه 10.49 صباحا بس الظاهر انكى نسيتى بعنوان ( الفتاه التى تواعد الشاب وهى ميته ).....هيه دى النهايه استاذ محسن
(( عفوا لقد تم حفر القبر الخطا حاول فى تربه اخرى ))

بصراحه انا اعجبني جدا اسلوب التشويق والحيره اللي خلتني فيها


بجد قولنا حقيقه القصه بجد


وحرام تسوبينا نفكر كتير انا فضولي بياكلني خلاص

اسف استاذ سبيه خيرى لانى عندما كتبت نهاية القصه لم اكن اقراء ردك بعد لانه موجود فى الصفحه 2 على العموم ردك بجد اعجبنى كثيرا بس انا قلت فى بداية القصه ان القصه دى رواها لى احد اصدقائى
ميرسى على الرد اما الاخطاء الاملائيه فانا بكتب على كيوبرد مش بكتب بقلم وبحاول اكتب باسهل الطرق
وطريقة سرد القصه حاولت برضو سردها بطريقه سلسه لكى يعيها كل من يقراءها
وميرسى على ردودكم جميعا
بالنسبه اننا نكون اصدقاء فانا يشرفنى صداقتك
بس انا بتقابلنى بعض المشاكل هنا على المنتدى زى ان مش عارف ابعت دعوات صداقه او حتى استلم
برضو فيه ملفات بحاول ارفعها فى مواضيع جديده وفيه مشاكل فى رفعها هنا
ومش عارف الخطاء ده من عندى ولا من المنتدى
واخيرا ميرسى على زوقكم جميعا وتشرفت بردودكم